വേനൽപ്പൂക്കൾ
വേനലിൻ അറുതികളിലെല്ലാം
ഹൃ ദയത്തിൻ ശോണിമയേറും
ഹൃദ്യമാം പൂക്കളുമായെത്തുന്നു
വേനൽച്ചന്തമായ് വാകപ്പൂക്കൾ !!!
കുണ്ടും കുഴിയും നിറഞ്ഞ വീഥികളെ
ചെംപട്ടു വിരിയാൽ രാജവീഥിയാക്കും
വാകപ്പൂവിൻ ഇതളുകൾ പൊഴിഞ്ഞൊരാ
പൂമരത്തണലിലലിയാൻ വെമ്പുന്നൂ ഞാൻ!
കുടിവെള്ളം പോലും കിട്ടാക്കനിയാകും
വേനലിന്നവസാന നാളുകളെങ്കിലും
വേപഥുവൂറും മനസ്സുകൾക്കെല്ലാം
പുണ്യമാകുമീക്കാഴ്ചയെ നെഞ്ചേറ്റിടാം...!!
- സന്ധ്യ അറയ്ക്കൽ
ചിന്തകൾ
ചിന്തമുള്ളോരു ജീവിതയാത്രയിൽ
ചിന്തയേറ്റി തളർന്നു നടന്നു നാം !
ഛത്രജീവിത ചിത്രംവിചിത്രമോ
ചാറ്റച്ചിങ്ങവെയിലറ്റമെത്തി നീ.....!
ചിറ്റുകെട്ടാത്ത ചേതനയ്ക്കപ്പുറം
ചില്ലുപാളിയടർത്തുന്നു കാലവും!
കാവടിയേറ്റി മെല്ലെനടക്കിലും
കാതമേറുമ്പോളൊന്നു വിയർക്കണം.
കാടകങ്ങളെ കാത്തുതാണ്ടുമ്പൊഴും
കപ്പമൂറ്റുന്ന ചിന്തകരുണ്ടുപോൽ!
കായമുണ്ടാം ബലത്തിനെന്നാകിലും
കാരണം വേറെയാണിത് തോഴരേ..!
- ഷീനാ ഹരി
സതീശം
രസമായിരുന്നു
സ്നേഹിതനോടൊത്ത
ചിറയ്ക്കരികിലെ നാളുകൾ
ഇലവിൻപശപോലെ
തൃണഗന്ധമുള്ളത്
മണ്ണിനോടൊട്ടി
മനം മറന്ന മലർമതി
ഇലവർങം തിളച്ചവെള്ളം
ദേഹശുദ്ധിയിൽ ആരാമഭിക്ഷ
വാനിൽ കുതിക്കുന്ന
സ്നേഹനായ്ക്കൾ
നക്ഷത്രലക്ഷ്യം തോന്നൽ
വഴിവിട്ട പ്രഭാതമർത്ഥന
രാവിലെന്നും സൂര്യനായ്
പർവ്വതം ഭൂമിക
അരങ്ങാം രംഗഭൂമിയിൽ
നിർജ്ജലസ്നേഹം തഴപ്പ്
ചൂടാവിയിൽ പ്രാണൻ
കോട്ടുവാ മനപ്പാതി
വേരടിയിലെ മതിൽകഷ്ണം
പുലയാചരണം കുളി
സഞ്ചയനം
കുത്തുപാളയിലസ്ഥിശേഖരം
നിമജ്ജനം മുങ്ങൽ
എന്നസ്ഥിയും ചേർത്തുമുക്കി-
ചിരിയൊതുക്കാൻപെട്ട പാടുകൾ
കാറ്റിലെവിടെയോ
പക്ഷിക്കൂടിൻ പഴി
ഉഷ്ണം കരച്ചിലായ് പകലുച്ചകൾ
കുമിഞ്ഞൂ സാകുലം ഓർമ്മനാഡികൾ
ഒഴിഞ്ഞൂ ഉടലാരവം ഊൺതളം വീറ്
പുത്രശോകമൊഴിയാൻ
അമ്മയ്ക്കരികിലായ്
അമ്പേറ്റടർന്ന പുത്രദാസ്യം
ലാസ്യം നീക്കിയ ഞരമ്പുവെറ്റില
മിഴിചൊല്ലുന്നിതോ മനം
പുതിയിടം പുകിലുകൾ
ഉലഞ്ഞൂ നാട്ടുമാവിൻ പൂങ്കുല
ഇടനേരത്തെവിടെയോ-
വിരൽ തൊടുന്ന
നദീതീരബാല്യം മടുപ്പ്
സംസാരസാരം മരുന്നെടുപ്പ്
പാപത്തീർത്ഥത്തിനായ്-
കൊതിപ്പങ്ക്
തീർന്നൂ കൊക്കുരുമ്മലും
പ്രാവിൻ ക്ഷീരംപകരലും
വിയോഗയോഗം കമ്പേറുപോലെ
എങ്ങോട്ടൊരുമിച്ചു-
കൂട്ടുന്നിതസ്ഥികൾ
കടൽചൊരുക്കുന്ന നേരവും.
- ഹരിദാസ് കൊടകര