വിശപ്പ് - ഷാജു കളപ്പുരക്കൽ

(തപസ്യ സാഹിത്യ ശില്പശാല - കവിതാരചനാമത്സരത്തിൽ ഒന്നാം സ്ഥാനം നേടിയ കവിത)

പകലിന്റെ ചൂടൊന്നാറുന്ന നേരത്ത്
പറയാതെ പലതും പങ്കുവെച്ചോർ നമ്മള്‍.

സന്ധ്യയൊന്നായാലിടക്കിടെ ഘടികാര -
മെന്തേ ചലിക്കാത്തതെന്നു  ചിന്തിച്ചവർ..

തിങ്കളിന്‍ ഭംഗിയെ
തൊട്ടറിയാന്‍ രാത്രി
തെല്ലും കളയാതെ ഒന്നിച്ചിരുന്നവർ..

പുലരി തന്‍ മഞ്ഞുകണങ്ങളെയൊരുപോലെ
തൊട്ടു തലോടി തിരിഞ്ഞു കിടന്നവർ..

ഇന്നീയിരുട്ടിന്റെയറ്റങ്ങള്‍ വാരി-
പ്പുതച്ചു നാം നിദ്രയെ തേടിക്കിടക്കവെ,

അറിയാതെയറിയുന്ന ദൂരങ്ങളൊരുപോലെ
നമ്മില്‍ വിശപ്പായി കത്തിപ്പടരവേ..