ശ്രീദേവി

 

കരിമ്പനയിലെ കാറ്റ്

ഓർക്കുന്നുവോ നിങ്ങൾ പോയ കാലങ്ങളെ,

ഭഗവതിക്കോലങ്ങൾ മുടിയഴിച്ചാടുന്ന 

കാവിലെയമ്മത്തറകളിൽ കുരുതിക്കായ് 

ബലിയാക്കപ്പെട്ടൊരെൻ ആത്മദാഹങ്ങളെ...

ചുടുനിണമുയിർ കൊണ്ട കണ്ണിന്റെ നോവിൽ 

നിന്നൊരു കൊച്ചു സാമ്രാജ്യമടരാടി നേടി ഞാൻ...

കാറ്റു വീശുന്നെന്റെ ചിന്തയിലിപ്പഴും,

ഹുങ്കാര ശബ്ദമായ്   കരിമ്പനപട്ടയിൽ

യക്ഷിയെ പോലവൾ നൃത്തമാടുന്നിതാ..

വാളെടുക്കട്ടെ ഞാൻ സ്തന്യം കൊതിച്ചൊരെൻ 

നാവിലൊരിത്തിരി രുധിരമിറ്റിക്കുവാൻ..

കൊല്ലണമെല്ലും നഖങ്ങളും ബാക്കി വ,

ച്ചവരുടെ മാംസം കടിച്ചുകുടയണം...

യക്ഷി ഞാൻ ഈ ഭൂമിൽ കൊല ചെയ്യപ്പെട്ടൊരാ,

പാവങ്ങളിൽ നിന്നുയിർ കൊണ്ട ശക്തി ഞാൻ..

                                              - ശ്രീദേവി