അജിത രാജൻ

 

കണ്ണേ മടങ്ങാതിരിക്കുക

മകളേ മെല്ലെത്തലോടി മായ്ക്ക നീ

ചോപ്പുകണ്ട കൈനഖപ്പാടുകൾ!

നീ കൊണ്ട തീച്ചൂളയിൽ നന്നായ്

തേച്ചുമിനുക്ക മനക്കരുത്ത്...

പോർച്ചട്ടയൊന്നു തുന്നിത്തരുമച്ഛൻ

അന്ധയോ ബധിര യോയാകേണ്ടതില്ല നീ

തടയണയൊന്നു തീർക്കണം നിത്യമായ്

അശ്രുപ്രവാഹത്തിൻ കുറുകെ നന്നായ്

ഇരുൾവീണ നിൻ സരണിയിലിനിയും

ചൊരിയും നവ കിരണങ്ങളൂർജ്ജമായി...

കണ്ണേ മടങ്ങാതിരിക്കുകയോമനേ

കൊടിമരത്തുഞ്ചത്തെ കൊടിക്കൂറയാകണ്ടേ...

നെറികേടിൻ വന്മരച്ചില്ലയിൽ ചെല്ലണം

ചെത്തിയെറിയണം ചില്ലകളോരോന്നും

ജ്വലിക്കണം നിൻ മഷിയിട്ട കണ്ണുകൾ

കരുത്തു നിറയ്ക്കണം വളയിട്ട കൈകളിൽ...

കാലത്തിന്നധരത്തിൽ വിടരും പൂക്കളിൽ

ഒന്നു നിനക്കുള്ളതാക്കണം മടിയാതെ

ഇന്നലെ,യിന്നും നാളെയും പുലരും 

ഉണ്മയെ; ഉൾപ്പേറും 

സത്യമാകണം നീ..

                                         - അജിത രാജൻ