മേഘങ്ങൾ വരയ്ക്കുന്നത്
മേഘങ്ങൾ സ്വപ്ന ചിത്രങ്ങൾ
വരയ്ക്കുന്നത് നീലമേലാപ്പിലാണ് ..
നിന്നെ ഞാൻ വരച്ചതും ഇളം നീലയിലാണ്..!
മേഘത്തെപ്പോലെ നീയും
ദാനശീലയും ഉദാരമതിയുമാണ് ..!
സങ്കടമഴയിൽ കഷ്ടകാലങ്ങൾ
കുതിർന്ന് തോർന്ന്,
തീക്ഷ്ണസ്വപ്ന കാവലാളായ്
എന്നും നീ നിലകൊള്ളണം,
വാക്കുകൾ കടം കൊള്ളണം,
ഇലപൊഴിയും ശിശിരം
നിൻ്റെ വരവറിയിച്ചപ്പോൾ
ഈറൻമേഘം കാറ്റിനെ
കൂട്ടുപിടിച്ചു..!
നിൻ്റെ ചിത്രം സൂര്യരശ്മിയേറ്റ വെണ്മേഘം പോലെ
തിങ്ങിത്തിളങ്ങി തിളച്ചു തൂവി..!
സപ്തവർണ്ണങ്ങളിൽ മഴവില്ല്
നിന്നെ എതിരേറ്റു ..!
കവിതേ, നിൻ്റെ പാൽ പുഞ്ചിരിയിൽ
എന്നും വസന്തം വിരിയുന്നു..!
മേഘങ്ങൾ വരയ്ക്കുന്നത് നിന്നെയാണ്, അവ നിൻ്റെ മിഴികളിൽ
അഴകുള്ള കരിമഷി ചാലിക്കുന്നു ..!
മാഞ്ഞു പോകുന്ന വെറും കാർമേഘ ചിത്രങ്ങളല്ല, നീ
എന്നിൽ മഴവില്ലിൻ കൊട്ടാരങ്ങൾ തീർക്കുന്നു ..!
കറുത്ത ചായങ്ങൾ മേഘങ്ങൾ കണ്ണീരായി പെയ്തു തീർക്കുമെങ്കിലും,
വെളുത്ത ചായങ്ങൾ വെണ്മയായ്, പരിശുദ്ധമായ് നിന്നെ കാത്തുകൊള്ളും..!
കാരണം നീ വെൺമേഘമാണല്ലോ..!
എന്നും നിൻ്റെ പാൽപുഞ്ചിരി
എൻ്റെ കവിതയ്ക്ക് കൂട്ടാകുമല്ലോ..!!!
ശുഭ കൊടക്കാട് (സുഭദ്ര ടീച്ചർ),
CNNBHS, ചേർപ്പ്, തൃശൂർ.
Ph: 9400843971
No comments:
Post a Comment