ചിന്താമേഘം
ഭൂമി ചിന്തയാണ് മേഘങ്ങൾ
മണ്ണും മരവും പോലെ
മനുഷ്യനും ചിന്തിക്കുന്നു
ചിന്തകൾ ശരീരിയല്ല
കൺഗോചരവുമല്ല
പെറ്റുവീണ ചിന്തകൾ
തങ്ങിനില്ക്കില്ല
വായുകുമിളയായി
ഉയർന്ന് പൊങ്ങും
വായുപോലെ
നീരാവിപോലെ
വാതപിണ്ഡംപോലെ
അന്തരീക്ഷപാളിയിൽ
വെള്ളിമലരായ്
കൂമ്പാരമായ്
ഘനീഭവിക്കും
തൂവൽകെട്ടുപോലെ
മൂടൽമഞ്ഞുപോലെ
പഞ്ഞിക്കെട്ടുകൾ
മഞ്ഞുപരലുകൾ
മനുഷ്യചിന്തയൊഴികെ
എല്ലാം മേഘവും
മഴയായും മഞ്ഞായും
ഭൂമിയിലേക്ക് തന്നെ
പെയ്തിറങ്ങും
ഇടിയും മഴയുമായി
ചാരവർണ്ണനും നീലനും
കരിമേഘനും
മണ്ണും മരവുമായിത്തന്നെ
തിരിച്ചിറങ്ങും
മാനുഷചിന്തകൾ
ഉയിർമേഘങ്ങൾ
അത്യുന്നതത്തിൽ
പരഗതിയില്ലാതെ
ചിന്താശീർഷങ്ങളായി
താറാവുകൂട്ടംപോലെ
അലഞ്ഞുകൊണ്ടിരിക്കും
പരശ്ശതംകോടി
മാനുഷചിന്താമേഘം
ചേർന്നാൽ
ഒരു അവധൂതദൗത്യം
ഭൂമിയിറങ്ങും
ഉണ്ണാതുറങ്ങാതെ
കുളിനനയില്ലാതെ
കടത്തിണ്ണയിലും
വഴിയമ്പലത്തിലും
വിമലനായ്
അടിപ്പടവുകളിൽ
കപടന്റെ കലാപവും
ചൂണ്ടി നടക്കും
കീറചുമൽകെട്ടിൽ
വെയിലും ശീതവും
അന്നോപേയമാക്കി
പറവപ്പറക്കലിലെ
സമനിലം കണ്ട്
പ്രളയംവരെ
ശോകാതപംപോലെ
മണ്ണടക്കുപോലെ
സംവഹനം കാത്ത്
മനക്കാമ്പിടകളിൽ
ഭൂമിചേർന്നിരിക്കും
ചിന്താമേഘവൃത്തികൾ
- ഹരിദാസ് കൊടകര
No comments:
Post a Comment